LOS AUCELS QU’AI CROSATS

Los AUCÈLS qu’ai crosats, una ora de ma vida
dins lo passat vòla eternament
amb mon arma d’aquela ora ;
coma d’un arbre de l’ivèrn
una fuòlha que se destaca
e qu’au fiu de l’aiga se’n vai.
Ieu d’aquela ora, aucèls d’antan,
palombas esvanidas,
ont vos menèt sens ges d’arrèst ni mai de patz
l’aiga dins sa fugida ?
Sempre sempre mon còr camina
romieu que non sap lo repaus
dins la comba de ma peitrina,
etèrne romieu jos un cèu
traversat d’abséncia d’aucèl.